Abrakadabra og stór dagur búinn!

Þá er einum viðamesta deginum til þessa lokið, en það gerðist ansi margt. Nú fyrst ber kannski að nefna að við fórum niður á leigumiðlun til að fá all pappíra og þar fengum við loksins undirritað og stimplað blaðið sem við þurftum svo að fara með niður á Bæjarskirfstofuna í Tempelhof og fá þar nýtt stimplað blað, sem veitir okkur öll réttindi. Þar fengum við einnig að vita að það er enn ein kellingin sem við þurfum að hitta, og það er miðvikudagurinn 30.jan, þá förum við í íbúðina og og hún fer yfir íbúðina og skráir ef það eru einhverjir gallar osfrv, og svo fáum við bara lyklana....að ég held.

Veit ekki hvort þið áttið ykkur á mikilvægi þessa pappírs hérna úti. En á myndinni sem fylgir þessari frétt, þá glöggt sjá að þetta er ekkert smá plagg :)

Að þessu loknu var svo haldið í Deutsche Bank þar sem ég fékk aðstoð frá henni Dísu vinkonu minni við að stofna bankareikning, og viti menn, það var bara ekkert mál, og hann var strax tilbúinn, og ég get bara byrjað að nota hann samdægurs!!! Ég átti ekki til orð, er Þýskaland skrifræðisins loksins að verða þolanlegra í mínum augum? Allavega, þetta gerði mér kleyft að fara í næstu Vodafone verslun og panta FEITUSTU internet tengingu sem er í boði: "Guten Abend, Kann ich den fettesten vorhandenen dsl haben"......eða eitthvað svoleiðis. Það sem er best hérna er 16Mb tenging með ótakmörkuðu niðurhali og heimasíma á 3995 ISK á mánuði, það er bara nokkuð gott, mv að ég var með 2Mb og heimasíma á ÍSL fyrir 4999ISK. En það á að taka að lágmarki 2vikur að afgreiða það, þannig að ég verð enn ekki kominn með þetta almennilegt fyrr en líklega á afmælisdaginn minn. Það er svosem ágætt, þarf svo að ræða við Janet um að fá smá aðstöðu hjá henni meðan þetta er allt að ganga yfir.

Nú degin lauk svo á ítölsku veitingahúsi, þar sem við Soffía skelltum okkur á svosem eins og einn pastarétt á mann.

Svona var þetta í hnotskurn, og að sjálfsögðu er maður ánægður með það.

Komnar eru nýjar myndir hérna til hliðar fyrir ykkur forvitnu einstaklingana í hópnum. :)

Bis Später,
Egill

Hótel Berlín

Þá erum við komin hingað á 4 hæðina á Hótel Berlín, sem við höfum áður heimsótt, og er með betri hótelum sem ég hef gist á. Og alls ekki svo dýrt, við erum að borga 8900ISK á nótt. Hérna er súper hratt þráðlaust internet sem er innifalið í verðinu á herberginu. Herbergið er stórt og mikið líklega stærra en "íbúðin" hjá brósa og mágkonu í Ástralíu.

Sparnaðarráð #1
Þjóðverjinn er skrýtin tegund af manneskju, það er óhætt að segja það. Þeir eru tildæmis alltaf að spara, og það er gaman að sjá ýmsar birtingarmyndir þess hérna í Berlín, t.d eru rúllustigar hérna á stóru lestarstöðvunum, og þeir eru ekki alltaf í gangi, heldur er skynjari sem setur þá í gang þegar einhver ætlar að nota hann.

Þurfum að hringja í kellinguna á morgun til að fá að vita hvað eru næstu skref, en með góðri lukku ættum við að fá lyklana á morgun, og vonandi að geta gengið frá mestu af pappírsútfyllingum líka. Annars er maður bara farinn að vera svona ligeglad á þessu öllu saman, þar sem þetta er eiginlega bara meira fyndið.

Setti inn nokkar myndir frá loka tímum flutning hérna, hafi fólk áhuga á að sjá þetta alltsaman.

Rólegt rólegt Rólegt

Þá er tveimur rólegustu dögum síðustu 3 vikna að ljúka og við að taka nokkrir erfiðir. Laugardagur og sunnudagur eru semsagt búnir að fara í það að hanga heima og horfa á videó og borða ljúffengar pizzur og drekka ljúffengan bjór. Veðrið er ekki búið að vera upp á marga fiska, og maður tekur því eins og hverju öðru hundsbiti. En við erum búin að hafa það virkilega gott það er ekki hægt að segja annað. Nú tekur bara við hin endalausa bið, og hún hefst á því að við förum á hótel, og höldum til þar þangað til á föstudag. Þá vonandi getum við farið að flytja inn.

Ég er annars á fullu að reyna að troða í mig aríunni "Di rigori armato il seno.." úr Rosenkavalier, eftir Richard Strauss, sem er notabene eina tenórhlutverkið og eina tenór arían í þessari 5-6 tíma óperu :) Nokkuð magnað.............og þegar Pavarotti söng þetta á sínum tíma, þá tók hann full laun fyrir.....!!! Það er nokkuð gott verð ég að segja, en þetta þetta er svosem langt frá því að vera auðvelt.

Hér er allt á fullu að ganga frá öllu ofan í töskur og svo er bar að vakna eldsnemma í fyrramálið og hringja á leigara, til þess að keyra okkur á hótel.

Svona er bara hið erfiða líf listamannsins....... :)

Hérna má svo sjá meistara Pavarotti syngja þessa fallegu aríu (þess ber kannski líka að geta þarna má sjá í vinkonu mína hana Kiri:)):


Di rigori armato il seno
Contro amor mi ribellai
ma fui vinto in un baleno
in mirar due vaghi rai.
Ma fui vinto in un baleno
in mirar due vaghi rai.
Ahi! che resiste puoco a stral di fuoco
cor di gelo di fuoco a stral.

So close........yet so far.......

Jæja ég vaknaði á venjulegum tíma í morgun en Soffía þurfti að rífa sig upp fyrir allar aldir :) Því við vorum að fara að undirrita leigusamning, og gerðum svona ráðfyrir því að í kjölfarið fengjum við loksins hina langþráðu pappíra sem þarf til að gera allt hérna í Berlín, svosem eins og að opna bankareikning, sækja um internettengingu, leigja videóspólur, fá búslóðina afhenta og svo framvegis, en þegar á staðinn var komið þá var það sko alls ekki málið.....Herra Sven Bosser var þó hin viðkunnalegasti og fór með okkur yfir eins mikið og hann gat tjáð sig á ensku sem var umtalsvert meira en flestir sem við höfum hitt hérna. EN........svo kom rúsínan í pylsuendanum, við undirrituðum einhverja pappíra, ég tel þó að mín takmarkaða þýskukunnátta hafi hjálpað til við að skilja þetta í stórum dráttum, og þar sem þetta er risastórt leigufyrirtæki, þá var þetta frekar staðlað, og ég held að við þurfum ekki að hafa of miklar áhyggjur af því að það sé verið að svindla á okkur. En í lokin kom það í ljós að við þurfum að hringja aftur á þriðjudaginn í næstu viku og tala við einhverja kellingu, sem lætur okkur hafa lykla og skrifar undir "Anmeldungið" sem er aðal pappírinn. Við erum samt búin að taka á það ráð að skrá okkur á Hotel Berlín sem er nokkuð fínt hótel og er með þráðlausu interneti, þannig að maður þarf ekki mikið að fara út í næstu viku.

Nú af söngmálum er það að frétta að við erum að flækjast fram og til baka með audition stuffið sem ég er að undirbúa, og er ég nú kominn með nýtt til að læra fyrir 8.feb, held svosem að það ætti ekki að vera vandamál. Þetta verður strembið, en ég er samt búinn að heyra comment frá píanóleikara sem hefur unnið fyrir audition liðið, og hann sagði að þau væru bara eitthvað skemmd í hausnum er þau ráða mig ekki í eitthvað :) Það er eflaust jákvætt komment.

Á bóndadaginn gladdi mín kæra Soffía mig með lífrænt ræktuðum jarðarberjum hjúpuðum í Lindt súkkulaðu og bjór (er það ekki annars lífrænt líka? :)) Og svo er stefnana að fara út að borða í kvöld á einhvern fínan Sushi stað.

Ég vil vekja athygli á því að nýjar myndir eru komnar inn, og hér til hliðar má smella og skoða þær fyrir þá sem lifa fyrir slíkt. Og til þeirra sem skipta máli segi ég "til hamingju með daginn" :) (Þau sem kjósa að sjá nauðgunarmyndmál í þessu geta bara átt sig) :)

Kurfürstenstrasse 75 er okkar... :)

Þá er það loksins komið á hreint og maður getur andað aðeins léttar. EN.....það er líklegt að við fáum hana ekki afhenta fyrr en 1.febrúar. Og það þýðir bara hótelgisting í eina viku eða svo. Sem ætti svosem ekki að vera mikið mál, en ég bara nenni því ekki. Ég get svosem ekki kvartað, er búinn að fá allt upp í hendurnar hérna og það er ég verulega þakklátur fyrir.

Við förum svo í fyrramálið að undirrita leigusamning á þýsku, vona bara að það sé ekkert smátt letur :) Ég mun reyna að pressa sem mest ég má á það að fá afhent fyrr, þar sem íbúðin er tóm, og ég get ekki séð að þeir tapi eitthvað á því að við komumst inn 3-4 dögum fyrr. En við sjáum til.

Við fórum aðra ferð í IKEA í gær, og fengum okkur að borða þar, alveg skítsæmilegt fyrir þennan pening. Þar fundum við rúm, fataskáp, sjónvarpsborð og sófa sem við getum hugsað okkur ásamt fleira dóti, ég leit bara svo á að þeim mun ódýrari húsgögn sem við kaupum, þeim mun dýrara sjónvarp get ég keypt mér :) ..........en það kemur allt í ljós.

Allavega, þetta er staðan í dag, kl 13:25 að þýskum tíma.

Evru andskoti!!!!

Um helgina gerðist sá markverði atburður að allt sem ég kaup í Berlín er nú orðið talsvert dýrara. Sem dæmi má nefna að lestarmiðinn hefur hækkað um tæpar 5 kr, flatskjársjónvarpið sem mig langar í hefur hækkað um 2700 krónur, reiðjólið sem ég ætla að fá mér hefur hækkað um 700 kr.

Þetta er bara alveg hætt að vera fyndið hvernig efnahagsástandið er orðið heima!! Maður þarf að fara reyna að koma þeim peningum sem hægt er úr landi, á meðan maður á eitthvað eftir.....

faxtækið misnotað

Í dag voru sendar um 10 blaðsíður í faxi til leigumiðlunarinnar, og vonandi dugar það til að klára þetta mál. Síðan þarf að fara með undirritað blað frá leigumiðluninni á sérstaka hverfisskrifstofu í Tempelhof og fá þau til að stimpla og staðfesta. Það þurfum við síðan að nota til að geta fengið bankareikning hérna, til þess að geta fengið íbúðina.....?!?!? Þetta er allt óttalega skrýtið og furðulega flókið. En ég held að þetta ætti að geta gengið.

Janet var svo dásamleg að taka við okkur og pappírunum okkar í dag, og einnig var hún með faxtæki og tölvu þannig að við gátum klárað þetta að mestu í dag. Vona svo að þetta skýrist allt á morgun og við getum bara farið að andskotast til að flytja inn, við eigum bara eftir eina viku hérna í fallegu íbúðinni á Scönhauser, og svo förum við bara vonandi beint inn í nýja íbúð á föstudag, eða í síðasta á mánudag.

Ég var svo í tíma í dag, sem gekk ekkert allt of vel, en svona er þetta bara, þetta gengur upp og niður, þó las ég að þetta væri væri versti dagur ársins samkvæmt einhverhjum útreikningum, og ég ákvað að skrifa þetta all á það :)

Kurfurstenstrasse 75

Tekin hefur verið óformleg ákvörðun um að fara þangað ef hægt er. Hérna má skoða myndir úr íbúðinni, þetta eru nótabene myndir sem eru teknar af myndavélalömuðum þjóðverja, þannig að íbúðin sést kannski í öllu sínu veldi, t.d sést ekki risastóra og flotta veröndin sem er einmitt mjög flottur sölupunktur. Ég held bara hér sé fólk alveg snar....

Allavega, hérna eru myndirnar:
http://picasaweb.google.com/egilltenor/Kurfurstenstrasse75

Annars er það að frétta af okkur héðan af Schönhauser, að við héldum hérna lítið matarboð á föstudagskvöldið, þar sem Janet Williams, kennarinn minn og Davíð Ragnarsson bassi komu, og við skemmtum okkur hið besta saman. Nú á laugardeginum þá áttum við að fara skoða íbúð en auminginn sem var að sýna mætti ekki, þannig að það varð lítið úr því. Við skelltum okkur þvínæst í IKEA sem er nú bara ekki langt í burtu, og skoðuðum þar úrvalið. Það versta er að staða evrunar er það leiðinleg um þessar mundir að hlutirnir kosta orðið það sama og á Íslandi. Þ.e sófi á íslandi kostar 39.900.- og hann kostar hérna 399 Evrur. Maður er því ekki að spara neitt rosalega hérna nema í mat og húsnæði, sem eru vissulega stórir kostnaðarliðir og það er bara gott mál. Maður á ekki alltaf að vera kaupa kaupa kaupa (sagt með rödd Drafnar Þorvaldz).

Nú á Sunnudag fór ég í undirleikstíma hjá mjög fínum píanóleikara sem heitir Scott Curry, hann er búinn að búa hérna og starfa í yfir 20 ár, og búinn að spila með ansi mörgum, þar á meðal Gunnar Guðbjörnssyni. Hann sagði mér að ég ætti alls ekki eftir að lenda í vandræðum með að fá eitthvað að gera við söng með þessa rödd og fannst ég ansi raddlega fjölhæfur að geta sungið Wagner og Mozart í sama tímanum án þess að það virtist erfitt....... :) Ég var auðvitað í skýjunum með þessar yfirlýsingar, en það eru samt sem áður MÖRG atriði sem þarf að vinna með þangað til ég treysti mér í einhvern svona söngpakka. Ég ætla bara ekki að fara óundirbúinn í þennan bransa, sama þó það þýði kannski styttri líftími sökum aldurs. Vil ekki vera þekktur sem tenórinn sem söng yfir sig og kláraði sig á allt of þungum hlutverkum. Ég hlakka því mikið til að vinna áfram með honum á næstu mánuðum. Við erum búnir að ákveða 2 af 3 aríum sem ég ætla að fara með í audition 8.febrúar nk. Nú er bara að finna þá síðustu og þá er ég bara reddí.

Ding dong.

Smá hjálp

Hægt er að smella á þessa mynd hér fyrir ofan. Við erum búin að setja saman smálista yfir það sem er í boði.

Endilega lesa yfir og gefa svo álit í skoðanakönnuninni hér til hliðar.

Blogg á morgun. Stay tuned.

Mariendorfer Damm.......?

Farið var að skoða íbúðir í Mariendorf í dag, það verður að segjast eins og er að það er komin skoðunarþreyta í mann, en m.v ótrúlega flottar íbúðir sem við sáum í dag, þá er ekki öll von úti enn. Í dag sáum við eina sem er nokkuð góður kostur fyrir okkur, hún er vissulega aðeins dýrari en við vildum en viðráðanleg.......þ.e ef evran fer ekki að hækka mikið meira.

En við eigum nokkrar flottar eftir og maður skal ekki spyrja fyrr en að leikslokum. Gallin við það sem við skoðuðum í dag, er að ekki er sól á svölunum nema til kl 14, og einhverjar kæliviftur eru í gangi líklega allan sólarhringinn, fyrir neðan, þar sem þar er svona hagkaupsbúð, sem er mjög hentugt. En ég held að almennt séu íbúðir hérna vel hljóðeinangraðar, þannig að það ætti ekki að vera vandamál. Stigagangurinn var glæsilegur með fallegri stórri lyftu, og stutt í kennarann minn og einnig stutt í U6 lestina sem er ótrúlega gott. Hin íbúðin fannst mér ekko koma til greina, þó hún væri milljónsinnum minni kreppuíbúð en það sem við erum búin að vera skoða, og bara alveg boðleg fólki. Það eru svo tvær á morgun, og ég veit ekki hvað.

Við fórum í dag rosalega fínan steikarstað í hádeginu, sem er eiginlega í "hverfinu okkar", þar sem nánast 99% líkur eru á að við flytjumst til Tempelhof, maturinn var bara æðislegur og skítódýr, það eru reyndar einhver svaka tilboð þarna núna. Þannig að við borguðum sem svarar 28EUR fyrir tvær 200gr piparsteikur, með tveimur sósutegundum, frönskum og grilluðum tómar, og svo auðvitað einn stór og kaldur + stór kók. Það þótti okkur ekki mikið fyrir svona góðan mat.

Jæja við erum ekki lengi að hefja matarboð, og á morgun er létt matarboð hérna á Alte Schönhauser, eins og ég sagði verða birtar einhverjar myndir frá því. Annarst er bara lítið að gerast :)

Kemst þótt hægt fari....segir einhversstaðar.

Ég er kominn á fullt í að vinna og það gengur bara svakalega vel, ég er jafnvel meira "efficient" hérna en heima.....sem ég hélt bara að væri ekki hægt.

Allavega í dag ákváðum við heilsuparið á Schönhauser, að fara hjólandi í næstu íbúðaskoðun (auðvitað með aðstoð frábæra GPS tækisins sem kom okkur þangað hratt og örugglega), þær íbúðir voru ekki langt frá Potsdammer platz, sem er flottur staður. Staðsetningin var frábær, en þvímiður var ekki hægt að segja það sama um íbúðirnar. Fyrri íbúðin var á 6.hæð, sem er 7.hæð heima á ÍSL, lyftan og stigagangurinn hefði getað tilheyrt einhverju fátækrahverfi í Ghana. Íbúðin sjálf var svosem í lagi að flestu leiti, nema hún var með "Wintergarten", sem er óþolandi fyrirbrigði (yfirbyggðar svalir, fyrir þá sem ekki vita). Ég var fljótur að ákveða að þetta væri ekki málið. Næsta íbúð var án efa sú ljótasta og viðbjóðslegasta hingaðtil. Ljótt teppi í svefnherbergi, sem var allt skítugt, viðbjóðslegt og rifið, íbúðin var ekki nýmáluð eins mér skilst að til sé ætlast af leigjendum þegar þeir skila af sér íbúðum hér í Þýskumælandi löndum. En stigagangurinn gaf tilefni til að þarna væri stórkostleg íbúð á ferðinni.

Nú svo fórum við bara heim og ég hentist í tíma hjá Janet, þar sem við fórum lauslega yfir það hvað ég ættlaði að fara með í áheyrnarprufu eftir c.a mánuð, eða 8.febrúar. Við Soffía erum búin að bjóða Janet og Davíð í mat á föstudagskvöldið, það verðu nú ljúft. Ég hendi inn myndum af því um helgina. En á meðan eru komnar nýjar myndir hérna við hliðina, fyrir þá sem skoða slíkt.

Schön Tag

Nýtt blog Soffíu

soffiajons.wordpress.com

Bloggar.is er drasl og látið það ykkur að kenningu verða.

Ég á bara ekki til orð.......

Þá er einum viðburðarríkasta deginum til þessa í þessari Berlínarför lokið. Við hófum daginn á að vakna mjög snemma, og ganga frá, svo þurftum við að hringja í taxa til að keyra okkur til Davíðs á Wiesenstrasse 30 í Wedding, við þurftum stóran bíl, þar sem við erum með um 7 töskur, þar af 5 mjög stórar. Þetta er ekki mjög auðvelt líf. En það gekk allt vel, og við vorum komin þangað von bráðar, svo var bara að bera allt upp 4 stiga, það var sjúklega gaman. Nú að því loknu fórum við á veitingahúsið Via Nova við Friedrichstrasse lestarstöðina, þar er frítt internet og mjög góður og ódýr matur. Þar vorum við í rúma 2 tíma að leita að íbúðum, en lítið fannst, við erum í raun nokkurnvegin búin að skoða allt sem við höfum mögulega efni á. Við fengum svo frábæra aðstoð í dag frá þýskri stelpu sem er einnig að læra hjá sama kennara og ég, hún fór með okkur að skoða eina íbúð í dag, þær áttu að vera tvær, en önnur klikkaðu vegna þess að fávitinn sem átti að sýna okkur mætti ekki, og þetta er í annað skipti sem þetta gerist!!! Ég á bara ekki til orð yfir dónaskapnum í þessum fasteignaleigugaurum. Nú en hin íbúðin var svosem allt í lagi, eldúsiinu má kannski lýsa best með því að segja ekkert, en restin var svosem þolanleg. Þó var stigagangurinn eins og versta nauðgunarmyndmál, þar sem hann var bara leiðinlegur og ljótur og ég fékk strax vonda tilfinningu fyrir þeirri íbúð.

Nú við hringdum út af annari íbúð á Schönbergstrasse 1, sem er ótrúlega falleg og ódýr, en reyndar bara 2 herb, og hrikalega vel staðsett. Ég er að vona að við náum henni, þá erum við góð og ánægð. Skoðum hana á laugardag, og eftirvæntingin er mikil, ég ætla þó að hringja aftur á föstudag og doubletékka, nenni ekki að fara fýluferð í það skiptið.

Nú svo eru fleiri gleðifréttir, en það ég hringdi í samskip í Bremen, þar sem búslóðin okkar er að koma til lands, og þeir geyma hana fyrir mig í heila viku, og svo þarf ég bara að borga um 20 evrur á dag eftir það, sem er bara mjög vel sloppið. Eins bauð kennarinn minn okkur að gista hjá sér alveg fram í febrúar, þar sem hún er með lausa íbúð og internet. Á þeim tímapunkti ætlaði ég varla að trúa mínum eigin eyrum. En þetta er sko ekki búið.......ó nei........haldiði ekki bara að mér hafi boðist stórkostlega íbúðin hérna á Schönhauserstrasse aftur!!!!!!!! hvaða andskotans rugl er þetta eiginlega, ég er bara búinn að vera í hálfgerðir vímu núna í kvöld og er svo sannarlega búinn að taka gleði mína aftur..........í bili :)

Fyrsti söngtíminn var svo í dag og það var ótrúlega gaman, haldið var áfram að vinna með lága barkastöðu, og þrönga munnstöðu til að passa að þetta verði ekki alltsaman sundurlaust. Nenni ekki að skrifa meira í bili, þar sem þú nennir eflaust ekki að lesa meira :)

Fyrsta helgin búin

Skoðaðar voru tvær íbúðir í dag, fyrir það fyrsta var lestarferðin löng og leiðinleg, og ég sé ekki fyrir mér að nenna því ef ég bý þar. Það var auk þess nokkuð langt í lestina frá húsinu. Þetta voru sko tvær íbúðir í sama húsinu. Þegar þangað var komið blasti við þröngur og skítugur stigagangur og lifta sem er plús. Upp fórum við og skoðuðum þriggja herb íbúðina fyrst, annan eins viðbjóð hef ég sjaldan séð í húsnæði sem er ætlað fyrir mannfólk, gólfin voru úr einhverjum gráum iðnaðarhúsnæðis dúkaflísum, íbúðin var drungaleg og sólarlausar svalir gerðu lítið til að fanga athygli mína, og því minna sem ég segi um ljósbláar flísarnar á baðherberginu, þeim mun betra. Þá fórum við í hina íbúðina sem var aðeins 2 herb, hún var öllu skárri, þó ljót væri, og stofan var með fallegu nýju parketi. Skemmtileg hornstofa var í íbúðinni sem maður svosem áttaði sig ekki alveg á hvernig myndi nýtast. Svalirnar voru á horni hússins, þar sem maður fékk fallegt ústýni yfir iðnaðarhverfi og hægt að fá sól alveg fram til kl 16. Baðherbergið var stórt en ljótt eins og hitt.
Við vorum því í raun fljót að yfirgefa staðinn og höldum áfram að leita.

Á morgun yfirgefum við þessa dásamlegu íbúð hérna á Alte Schönhauser Strasse 42, og förum í heimagistingu hjá Davíði nokkrum Ragnarssyni sem býr hérna og er góður kunningi minn. Þó kann maður alltaf illa við að búa inni á fólki. Ég er búinn að ræða við annan strák sem ég þekki og er nýfluttur hingað, ferlið tók hann 6 vikur frá því að hann kom og þangað til hann var kominn í íbúð. Skrifræðið og vankunnátta þjóðverja á enskri tungu er eitthvað sem fólk þarf bara að upplifa til að skilja, í fáum orðum fáránlegt!! Ég á því alveg eins von á að komast ekki í eigið húsnæði fyrr en á afmælisdaginn minn 12.febrúar.

Í gær skellti ég mér svo á sýningu í Hanns Eisler skólanum þar sem Dísa vinkona mín úr söngheiminum var að syngja, það var auðvitað mjög flott hjá henni og eins þótt mér baritóninn mjög góður, en leikgerðin var ÖMURLEG vægast sagt, þetta var einhver 45 mínútna Rigolettó sýning þar sem var notast við videó tæknina sem er orðin svo fræg í öllum sýningum nú til dags. Eftir sýningu var farið út og örfáum hvítvínsglösum slátrað ásamt smá mat. Geðsjúkir þjóðverjar reykja ennþá á stöðum þrátt fyrir að hér ríki um það bann, og maður getur ekkert sagt, það tekur víst um 6 mánuði þangað til það verður farið að framfylgja þessu, þvímiður.

Í kvöld fórum við Soffía á Monsieur Vuong, sem er víetnamskur veitingastaður hérna í 30m fjarlægð, frábær matur, en matseðill er bara um 4 réttir og frekar hröð þjónusta og vingjarnleg, þetta er svona fast-food staður og maður fer ekki þangað til að spjalla og hafa það næs. Svo röltum við bara eftir matinn á Alexanderplatz, þar við fengum pokkur Häagen-Dazs í eftirrétt.

Stór dagur á morgun: Skoða 2 íbúðir sem okkur líst vel á, flytja allt dótið okkar á næsta áfangastað, fyrsti söngtíminn, leita að fleiri íbúðum...............og öruggleg eitthvað meira.

Ég er kominn með síma: 490-8904 (netsími Vodafone) bara eins og hringja í innanlandsnúmer á Íslandi.

Þangað til síðar.

Jákvæðir straumar

Er svosem ekki mikið frá því að jákvæðir straumar séu að virka, þar sem við erum búin að bóka okkur í 5-6 skoðanir í næstu viku. Núna ætla ég að taka frí frá áhyggjum yfir helgina og njóta þess að vera hérna.......þó hér sé pínulítið kalt, er allavega bjart yfir daginn. Það byrjar að birta upp úr kl 6, en það kvöldar upp milli 16 og 17. Þannig að maður þarf allavega ekki að kljást við eitthvað helvítis skammdegisþunglyndi :)

Alltaf erum við að finna nýjar og nýjar íbúðir til að skoða, og fundum DRAUMA íbúðina í dag, en hún er andskotan ekki laus fyrr en 15.febrúar, og það liggur við að maður vilji bíða eftir henni. Þó held ég að barist verði um hana, þar sem hún er að besta stað í bænum og í rosalega´fallegu nýtískulegu húsi og ákkúrat nógu stór/lítil.

Meira síðar

Styttist í óðum í óvissuna

Þetta er ekki allt að ganga eftir áætlun eins og gaman hefði verið. Við erum enn ekki búin að finna íbúð, en þó erum við að fara skoða nokkrar, eina í dag og 2 á sun að mig minnir. Þetta er gífurlegt álag að þurfa að standa í þessu, skil ekki alveg hvað ég var að hugsa. Það sem gerir þetta margfallt erfiðara alltsaman er að við eigum svo von á stórri búslóð, hún lagði af stað í gær ef ég skildi þetta rétt, og þá höfum við c.a 1-2 vikur að finna einhvern stað. Þannig að eins og maður reynir nú að halda jákvæða skapinu sem mest uppi, þá kraumar alltaf undir niðri eitthvað sem er mjög raunverulegt og erfitt.

En allavega erum að fara skoða nokkrar, og við getum líka í raun farið aðeins útfyrir og verið í ótrúlega fallegum nýjum íbúðum á sama verði og við erum búin að vera skoða, en þá er farið að verða vandamál að nýta sér lestasamgöngur. En auðvitað á maður þá bara að byrja að hjóla :) Ég brosi því gegnum tárin þessa dagna, en verð að treysta því að þetta gangi allt vel. Erum að skoða nokkur hótel sem við þurfum að skella okkur á á mánudag. Þá er helst verið að leita að hóteli með þráðlausri tengingu þar sem ég get unnið. Það er auðvitað dýrara en við verðum bara að láta okkur hafa það til að það verði sem minnst truflun.

Ég er ekki einusinni farinn að hugsa um það að fara í söngtíma á mánudag, en þá hefst ævintýrið sem ég kom hérna til að fara í, og áheyrnarprufa 8.febrúar, það styttist og styttist.

Við þurfum góða strauma þessa dagana og ég vona að fólk sendi okkur smá jákvæðni hingað í land súrkálsins.

Bis Später,
Egill

Vikan líður og líður

Húsnæðisleit ásamt vinnu er efst á forgangslistanum þessa dagana, þar sem ég get ekki án þess verið. Maður leyfir sér ekki alveg að vera túristast, það er skrítin tilfinning. Skoðuðum tvær íbúðir í dag, sú fyrri var þess eðlis að ekkert eldhús var innbyggt, sem mér skilst að sé einhver lenska hérna í landi karrýpylsunnar. Og konan sem var að sýna var nú ekkert allt of jákvæð, hún byrjaði á að segja okkur að það yrði efrfitt að fá fá íbúð þar sem tekjurnar mínar eru ekki frá þýskalandi og þarafleiðandi ekki hægt að aðhafast neitt ef ég borga ekki, þar sem ég á ekki neitt :) Og svo sagði hún að almennt væri ekki hægt að leigja í stuttan tíma, þ.e undir einu ári, það væri bara lágmark 2 ár. Maður var á þessum tímapunkti dottinn í hálfgert þunglyndi, þar sem þetta má alls ekki taka langan tíma. Við erum jú að fara úr íbúðinni á mánudaginn kemur.

Næsta íbúð sem við skoðuðum er að flestuleiti frábær, allt nýtt, við yrðum í raun fyrstu íbúarnir í nýuppgerðri íbúð, en.....hún er ekki með svalir, sem okkur þykir algjört möst. 3 risastórum herbergjum, fallegu baðherbergi en litlu eldhúsi sem þó dugar. Sölumaðurinn þar sagði ekkert skipta máli, við bara leigjum helvítið, og það var vissulega gott að heyra það. Núna erum við að byrja að skoða soldið frá upprunalegu plani, þar sem það gæti verið hentugra á heildina litið. Og maður er í raun alveg kolruglaður af þessu öllusaman.

Ég keypti mér GPS tæki í gær til að hjálpa til og það hefur þegar sýnt mátt sinn í verki með einstaklega góðri þjónustu.

Í matinn í gær var einstaklega gott Knorr pasta, brauð og salat með melónu, og í kvöld eru það kjúklingabringur með brokkolí, sveppum og kirsjuberjatómötum.......í Knorr sósu :)

Á morgun er svo stefnan að reyna að skoða 1-2 íbúðir en ekki er búið að hringja, þannig að ekki veit ég hvað gerist í því, mér finnst líklegt að við förum á hótel í næstu viku, en vonandi reddast þetta bara.

Komin til Berlínar

Þá er maður kominn í tímabundna húsnæðið sitt í Berlín. Dagurinn hófst í morgun kl 8 þegar maður þurfti að rífa sig upp :), og fara að klára að pakka í töskur það sem átti að taka með sér. Við lögðum af stað og komum fyrst við í ápótekinu í laugarásnum, til að sækja eintak af aðventutónleikum skálholtskórs, ég bölvaði því að að vera ekki með CD spilara í bílnum!! en.... ég var hvort sem er að fara að selja hann :) Selfoss tók við og bílnum hent á bílasölu, og svo var brunað í bæinn þar sem minn ástækri bróðir hafði útbúið dýrindis máltíð handa okkur. Þar var svo sagt bless og haldið á flugvöllinn.

Á vellinum biðu ekki góðar fréttir, þar sem helvíts express rukkaði okkur um 30.þús krónur í yfirvigt, og ekkert sem hægt var að gera til að breyta því!! Það sorglega við þetta er að vélin var hálftóm, og því hefði þetta ekki átt að vera vandamál. Icelandair, mega eiga það að þau hafa ALDREI, og ég hef flogið nokkuð oft, rukkað mig um yfirvigt, sama hvað. Þó hef ég aldrei farið 15 kg yfir, en ég hef farið 10 kg yfir og samt sloppið. Ég mun forðast Express héðan í frá.

Erum í þessari líka rosalega flottu íbúð hérna á Alte-Schönhausersrasse 42, þvílíkt nýtískuleg og flott!!! Maður nennir eiginleg ekkert að vera leita að nýrri íbúð núna :) En við erum bara hérna fram á næsta sunnudag, og svo þurfurm við að fara annað, hótel, nýja íbúð ,eða bara það sem tekur við..........mjög spennandi!

Fórum í sushi á Aiko Sushi í kvöld og það var top notch, þó ekkert komi til með að toppa Asia Kan í New York i bráð.

Meira síðar og jafnvel myndir.
Viel spass

Dvöl minni lokið á Íslandi........í bili

Þá er mjög erfiðum dögum lokið. Búið að koma meirihluta búslóðar í geymslu hjá "parental units", og restin farin í ruslið (4 ferðir í SORPU á stórum bíl) eða á bretti til Berlínar.

Það er blanda af tilhlökkun og sorg fólgin í því að yfirgefa svona landið sem maður hefur búið á í rúm 30 ár. Fullt af nýjum hlutum að fara taka við og mun fleiri tækifæri í boði en áður. Maður verður bara að taka sig saman í andlitinu og læra að njóta þess sem koma vill :)

Hér verður virkt blogg um tap og sigra í Berlín, ásamt öllu því sem fylgir því að flytja til annars lands.

Meira á mánudaginn.....

Þangaðtil þá,
Egill