Inn og útúm gluggan, langt síðan maður hefur bloggað

Viðburðarríkri helgi er nú lokið, og við er tekin undirbúningur á næstu törn.

Helgin hófst á því að ég sótti bílaleigubíl á föstudeginum, því það átti að nota hann til að versla inn fyrir veisluna, og bara til að létta okkur lífið almennt á föstudeginum og laugardeginum. Nú ég sótti bílinn kl 16, sem var alveg hrikalega ljótur og ömurlegur gömlukonubíll að nafni Nissan Micra....!!! En hann virkaði, og það var svosem það sem skipti máli þarna. Hóptími var hjá Janet, þar sem ég söng tvö lög til að undirbúa tónleika sem nokkrir nemendur Janet eru að fara syngja 11.maí næstkomandi. Mér gekk ekki vel, þó aðrir hafi sagt annað, en það er á endanum mín skoðun sem ræður eins og venjulega :) Þó komu margir góðir punktar sem ég gat nýtt mér. Við Soffía hentumst svo í Kaufland til að gera innkaupin fyrir partýið, við settum um 130 EUR í þetta, sem var nokkuð vel sloppið, miðaðvið að við vorum með mest allan matinn, 5 flöskur af rauðvíni og 3 flöskur af freyðivíni í pakkanum. Um kvöldið notaði ég svo bílinn til að kíkja í partý til Dísu á Torstrasse, það var nú meira meira, ég segji nú ekki annað, en ég er bara ekki vanur svona partýstandi, og því er það eflaust eðlilegt, ég er eiginlega fegin að vera ekki partý týpan. Nú nú en ég stoppaði nú ekki lengi, þar sem stór dagur var framundan. Var kominn heim rétt fyrir 12 á miðnætti, og fór að sofa fljótlega eftir það. Svo var vaknað í aldeilis dýrindisveðri um 10 leitið, og keyrt af stað með fullt af endurvinnslu plastflöskum osfrv. Haldið var fyrst í Getränke Hoffman, sem er svona drykkjavörubúð. Þar fékk ég 10 evrur fyrir flöskurnar sem ég skilaði inn og keypti einn kassa þarf af bjór til viðbótar auk 2 kippur af minni bjór í flöskum. Þetta kostaði mig ekki nema um 15 evrur. Svo var farið í Reichelt, sem er svona Nóatúnið hérna hjá okkur, til að versla það sem uppá vantaði. Einnig fór ég með um 40 plastflöskur í endurvinnsluna í leiðinni og gat verslað það sem okkur vantaði fyrir það sem fékkst fyrir það. Svo var bara haldið heim á leið að slaka á meðan Soffía þreif og sá um matinn, reyndar tók ég nú duglega til í tölvuherberginu mínu og gerði einn af réttunum sem var í veislunni, en að öðru leiti gerði ég ekkert, og töllti mér meira segja á hverfispöbbinn til að fá mér einn öl og sitja í sólinni, á meðan ölið okkar fór í frysti til að kólna nógu hratt.

Veislan kom og mættu flestir sem ég bauð, og stemmningin var bara rosalega fín og fólk borðað almennt vel, en drakk heldur minna :) Fólk var svo bara farið um miðnætti, en íslendingarnir voru eftir og við horfðum á nokkur vel valin myndbrot af óperutengdu efni á Youtube, ásamt því að kryfja málin til mergjar, eins og gerist. Daginn eftir var ég svo að fara syngja og þurfti að taka lest í rúma 3 tíma til að komast þangað. Lestin fór kl 10:30, og þegar ég vaknaði var ég svo þunnur að mér hefur sjaldan liðið eins illa! Ég passaði mig að drekka ekki mikið (4 rauðvínsglös, 4 kampavínsglös), ekki mikið eins og sjá má, en vanlíðanin sem fylgdi var slík, að ég svitnaði og var snjóhvítur og hélt engu niðri..........og ég var á leið í 3 tíma lestarferð með fólki sem ég þekkti nánast ekki neitt!! og að syngja fyrir fólk sem ég vissi ekkert um. Verulega skemmtilegt það, en ég náði þó að sofna rétt aðeins í lestinni og leið aðeins betur við það. Þegar við komum í þetta ágæta heimhús, sem myndi sóma sér vel fyrir 20 manna fjölskyldu, þá frétti ég að við vorum að fara syngja fyrir Wagner félagið í Minden, sem, fyrir mig sem léttan Helden tenór var auðvitað mjög góð kynning. Þrátt fyrir líkamlegt ástand mitt, hef ég sjaldan sungið eins vel og verið eins solid. Þetta er að vissuleiti gott, og ég hafði vissan grun um að þetta myndi ganga svona vel. Því ég hef áður sungið þegar mér leið illa, og þá gekk mér stórvel. Þetta segir manni að þegar allt annað bregst, þá er það góð söngtækni sem bjargar :) Ætli ég sé bara ekki með góða söngtækni :)

Allavega var ég ausin lofi, og fólk grenjaði í salnum......osfrv allt sem við sem söngvarar viljum geta gefið fólki. Konan sem skipulagði þetta vildi svo bjóða mér á Wagner hátíðina í Bayreuth, sem ég var einmitt búinn að fara á (í fyrra), og vegna þess að ég hef áður verið styrkþegi (Stipendaten, heitir það víst), þá mátti ég það ekki. Sem er svosem allt í lagi, það á að leyfa sem flestum að prufa þetta. Allavega, við komum svo heim um kl 21:30 um kvöldið, og ég var kominn með matarlystina aftur og fékk mér sushi til að fagna því. Þessir tónleikar voru teknir upp á videó, og ef ég tel að sé sýningarvænt mun ég henda því inn á youtube við tækifæri, og birta hér á síðunni.

Fyrsti tíminn minn hjá David Jones var í dag, og sem fyrr var það mikið breakthrough, lærði tvö merkileg hugtök sem ég hafði ekki heyrt áður. Marsbúaröddin (sem er ætlað að hjálpa manni að halda raddböndunum saman) og svo hjtt hugtakið, að lyfta ekki tungurótinni heldur að ýta henni létt fram á við og niður!!(hljómar eflaust hættulegt fyrir raddpúrítana, en þetta svínvirkar fyrir sumar raddir, og sem betur fer hef ég kennara sem skilur það). Svo var sest út seinni partinn og tekinn einn öl á línuna og létt spjall. Allt í allt súperfín helgi, og ég hefði getað skrifað mun meira hérna um hana, en læt hér staðar numið. Næsti tími hjá David er svo á miðvikudag, en þá má búast við öðru bloggi frá mér. Í millitíðinni getur fólk yljað sér við nokkrar ljósmyndir sem eru nú komnar inn, nýjar, á myndasíðuna mína.

Viel spass

Alveg magnað!!.....og Gleðilegt Sumar (þar sem það á við)

Hitastigið þegar þetta er ritað (um 18:30) er 25°, í forsælu, hvorki meira né minna, þessu má ekki rugla við 25° sem Ásgeir Páll fær hjá sér með því að láta hitamælirinn liggja í beinni sól :). Þannig að við erum auðvitað í skýjunum yfir þessum hita. Það er varla að maður trúi því að svona verði þetta í sumar, og það sem meira er, hægt að treysta á þetta að mestu!


Frúin að sóla sig og hitamælirinn sem sýnir meiri hita úti en inni, það er óvenjulegt að sjá :)

Það er eins og hér hafi nánast allt sprungið út yfir helgi og borgin er að byrja að skarta sínu fegursta. Þó eru nú einhverjar trjátegundir sem eru seinar að taka við sér og laufgast ekki strax, en það sem er komið er alveg nóg.

Síðast tími hjá Janet var mikið breakthrough fyrir mig, sérstaklega til að sanna fyrir sjálfum mér að kannski get ég gert þetta á consistant basis (veit ekki íslenska orðið yfir þetta) þeir sem vita mega kommenta, gjarnan. En þessi uppgötvun felst aðallega í því að læra að halda raddböndunum almennilega saman, meðan sungið er upp í gegnum passagioið (mið c til Fís) og svo auðvitað áfram upp. Ef þetta er ekki gert, rétt, þá er hætt við að maður kafni á tóninum, þetta er einmitt allra stærsta hindrun í vegi tenóra almennt, og því var þetta mikið gott fyrir mig að fatta þetta loksins. EN! þetta er náttúrulega ekki komið ennþá, nú þarf að vinna þetta áfram og fá þetta til að verða hluti af eðlilegu söngviðbragði. Það er auðvitað fullmikið einföldun að segja að þetta sé lykillin, þar sem margt annað þarf að vera í góðu lagi áður en þetta finnst, eða vinnst, en þetta er lykillinn hjá mér þessa stundina.

Búið er að setja general á Nordischer Klang tónleikunum, og hana ætlum við að halda í Hans Eisler hérna í Berlín, 7.maí nk kl 19:00, allir eru auðvitað velkomnir að koma og hlusta, okkar er ánægjan.

Í matinn í kvöld verður "Pasta con Pesto alla Genovese"

Nú fleira verður þetta ekki í dag..............veriði sæl.

Ýmislegt að gerast......

Já það hefur mikið vatn runnið til sjávar frá síðasta bloggi mínu. Það vatn sem helst um ræðir er söngvatn......(no pun intended). Ég sagði frá því í síðustu færslu að það stæði jafvel til að ég syngi eitthvað óperettudót þarnæstu helgi ,og ég var farinn að undirbúa hvað ég ætlaði að syngja og farin að taka allt til, svo hitti ég konuna sem er að sjá um þetta í í dag, og þar var ákveðið það sem ég ætla að syngja, sem ég taldi nú ekki vera mikið mál þar sem ég hef jú viku til að læra textana og gera þetta almennilegt............en hvað haldið þið? jú jú þetta er barasta núna á sunnudaginn!!! Og ekki nóg með það, þetta er í Minden, sem er um 350km vestur af Berlín! Þetta þýðir að ég þarf að leggja af stað eldsnemma á sunnudagsmorgun (sem eyðileggur fyrir mér partýið á laugardaginn), ég fæ sem betur fer far. En það er sama, þetta er langur tími í bíl, og gert er ráð fyrir að fara kl 10 um morguninn og koma heim kl 22 um kvöldið. Ég er að sjálfsögðu ekki kominn með allt mitt utanbókar og því hefst barátta næstu daga að berja þetta inn í hausinn á mér. Púff, jæja, en þetta er svosem það sem ég er að gera hérna, láta til mín taka á söngsviðinu. Nú svo kom upp skemmtileg hugmynd í dag, um að ég gæti hugsanlega tekið að mér baritónhlutverk í Fledermaus, sem nemendur í Hans Eisler skólanum eru að fara setja upp, það væri vissulega gaman að gera það, en auðvitað er þetta bara skemmtileg hugmynd eins og er.

Söngtími hjá Janet á morgun, og þá gerist vonandi eitthvað stórfenglegt, ef ekki þá bara næst. Hér er bara loksins að koma sumar, og ég fagna því á hverjum degi, þó lítur laugardagurinn ekki nóguvel út, sólarlega séð, en hitinn verður fínn, og kannski gæti ringt sem væri leiðinlegra. Við erum búinn að bóka bílaleigubíl á föstudag og laugardag, bara til að geta gert öll innkaup snarlega og örugglega. Þetta verður létt veisla hjá okkur byggð að mestu á brauðréttum. Þeir eru alltaf góðir.

Nú er bara að vona að allt fari vel og allt gangi upp.....eins og venjulega :)

Mínir menn sigruðu!

Bayern Munchen er bikarmeistari í Þýskalandi eftir að hafa sigrað Borussia Dortmund 2-1 eftir framlengingu. Hér var gífurlegur fagnaður í gær og reyndar allan daginn, fólk í gulum og rauðum fótboltabúningum troðfylltu bæinn með tilheyrandi drykkjulátum og gleði. Það var skemmtilegt að kíkja aðeins í bæinn í gær og kynna sér þetta alltsaman. Við Brandenborgarhliðið var búið að koma fyrir risa stórum skjá (á stærð við hliðið sjálft þar sem sýnt var beint frá leiknum). Undirritaður komstþvímiður ekki að sjá þennan viðburð :)

Ég fór hinsvegar í tíma hjá kennara(coach) við Hans Eisler tónlistarháskólann, og hann sagði bara hreint út að kennarinn minn væri augljóslega að gera góða hluti, og hann heyrði ekki oft í söngvurum sem væru tæknilega svona vel staddir, ég var auðvitað mjög ánægður að heyra það. Hann bauð mér einnig að syngja í einhverju svona "heimahús partýi" sem eru víst algeng hérna, þar sem vel stæðara fólkið heldur svona tónleika heima hjá sér og býður nemendum að koma fram, hann sagði að þetta borgi ekki neitt, en þetta fólk er gamalt og ríkt, og vel tengt, og því gæti þetta verið góður leikur. Þetta er semsagt óperettuþema, og ég á einhver stykki þar, því ætti þetta að ganga vel. Hann vill semsagt endilega vinna mér mér meira, og það eru góðar fréttir fyrir mig.

Eftir tímann fór ég að hitta strák sem ég vann með fyrir 2 árum, hann var hér í vinnuerindagjörðum, og við mæltum okkur mót á litlu kaffihúsi, hann bauð mér upp á bjór og við spjölluðum aðeins. Á leið minni að hitta hann rakst ég á þetta hérna:

Þetta er semsagt rúta félaga minn í Bayern Munchen, fyrir framan hótelið þar sem þeir gista.

Þarna var hópur af fólki saman komin til að fagna þeim félögum, þetta var þó áður en leikurinn hófst.

Veðrið í dag er með allrabesta móti.....hingað til allavega, og við Soffía tókum góðan hjólatúr um okkar næsta nágreni. Það er ekki alveg orðið nógu sumarlegt ennþá, en dagurinn í dag ber fyrirheit um góða tíma.

Frumorta vísan mín vekur viðbrögð sem er gott að sjá. Þó hafa vissulega sumir einstaklingar ósanngjarnt forskot á aðra sökum menntunarstigs eða annars sem ekki er þorandi að nefna. Ég er ánægður með það að fólk hefur ekki séð sig tilneytt til að setja út á bragarhátt eða annað sem heitir svipað bjánalegum nöfnum. Þar sem ég er skápavísnahöfundur, og geri þetta ekki allajafna.

Er húmar að kveldi..

...þá gerist ekki neitt.

Elstu börnum refsað mest (tekið af MBL)
Frumburðir bera meginþunga af agaviðurlögum foreldra sinna, samkvæmt niðurstöðum rannsóknar sem birtist í Economic Journal. Komust vísindamenn að því að yngri börn í fjölskyldu þyrftu mun sjaldnar að þola refsingu en þau elstu.
Leiðir þetta til þess að öðru, þriðja og fjórða barni í fjölskyldu hættir til að leiðast af réttri braut þegar aldurinn færist yfir. Segja skýrsluhöfundar þau líklegri til að hætta í skóla, neyta áfengis eða eiturlyfja eða eignast börn á táningsaldri.

Ekki frá því að þetta sé nokkuð rétt :)

Búið er að henda okkur inn á dagskrá Nordischer Klang

Áætlað er að hittast á morgun til að fara æfa eitthvað fyrir þetta, og maður er að lesa og læra texta fyrir tilefnið, það er stórgaman auðvitað :)

Sem fyrr er veðrið hérna eins og í leiðinilegustu lygasögu sem samin hefur verið, rigning, rigning og aftur rigning. Það er eitthvað að hlýna, og við megum eiga von á þrumuveðri á morgun eða um helgina. Þetta er náttúrulega bara stórkostlega frábært, svo ekki sé meira sagt.

Ekki gengur mikið né rekur í þyngdartapi, þrátt fyrir stífar æfingar og markvisst matarprógram, það er ekki nógu hvetjandi, en það að mér líður betur segir meira en mörg orð, því verður þessu haldið áfram þar til ég fer að æla blóði af ofreynslu. Söngur er allur að koma til, og í gær rendi ég yfir mjög erfiða aríu úr óperunni Le Cid eftir Massenet. Mjög falleg og frekar erfið. Ég er loksins að sjá fyrir endan á ákveðinum raddlegum erfiðleikum, og það er vissulega bjartara framundan með blóm í haga. Svo er David auðvitað að koma í næstu viku, og þá fæ ég vonandi sérstaka innspýtingu. Ég ætla að reyna að taka það upp á Videó, og ef það er sýnanlegt, þá birti ég kannski smá brot frá þessu öllu saman.

Í lokin birti ég hérna í anda karls föður míns, litla vísu,

Hvað er ég?
Ekki er ég valin úr hópum kvinna,

tilheyri samt, án þess að vinna.

Lítið ég gef nema kærleik í hjarta

Tek mér það leyfi aðeins að kvarta

þegar ég þarf þess því þannig ég lifi.

Hræðslu ég vek þó sumum í huga

þó er ég saklaus en næ fólk að buga

gefðu mér ást þína, líf og hjarta

ég hef mér þá eitthvað í lífin'að skarta.

því að ég þarf þess og þannig ég lifi.

-------

Allt er rugl

Jaaaaaaæja, þetta er nú alveg að verða komið gott!! Þegar veðurfarið á Íslandi er orðið betra en hérna, þá finnst mér nóg komið. Púff, getur maður endalaust pirrað sig á veðrinu? Já ég held það, þar sem það hefur bein áhrif á skapið.....allavega í mínu tilviki.

Ég átti tíma með Janet í morgun, og fór hjólandi af stað í grenjandi rigningu sem er hér núna, og verður í dag, og hugsanlega næstu daga. Þegar ég kom svo á staðinn, þá var annar nemandi hennar líka mættur, og taldi að hún ætti tíma núna, það reyndist vera svo að ég átti í raun tímann, en hún átti að vera á morgun. Hún var fullbókuð út vikuna, þannig að ég bauðst bara til að taka tímann hennar á morgun í staðinn. Svo hjólaði ég heim á leið, það er fínt að hafa frelsi til að hliðra til og þurfa ekki að vera alvega fastbundinn. Þó ég sé það að vissu leiti vinnunnar vegna. Ég samdi um að vera hérna í 70% vinnu, en raunin hefur verið sú að ég hef nánast verið að skila um 95-100% síðan ég kom, því það hefur verið mikið að gera, það er vissulega bæði jákvætt og neikvætt. EN það er eins og það er. Ég sé það sem jákvætt, þar sem án vinnunnar gæti ég ekki verið hérna að "leika mér", ég er því mjög þakklátur því trausti sem EJS sýnir mér með því að leyfa mér að vinna svona í fjarvinnu.

Hilmar er búinn að breyta æfingunni sem átti að vera á nk fimmtudag yfir á föstudag, þar sem hann er að fara til Leipzig. Skiptir litlu fyrir mig, ég hef nægan tíma, þá hef ég líka einn dag í viðbót til að reyna að læra músíkina sem við ætlum að flytja.

Janet var að biðja mig að syngja 20 mín tónleika ásamt 2-3 af hennar nemendum í Finlandia Zentrum, sunnudaginn 11.maí. Ég sagði að sjálfsögðu já, þar sem mig þyrstir í eitthvað að gera hérna. Þetta er reyndar daginn eftir að ég kem heim frá tónleikunum í Gristow. EN þetta hlítur að smella allt saman. Nú svo svo var ég að heyra í Hilmari með hugsanlegt annað gigg á svipuðum stað, en það myndi verða 17. eða 18.maí. Það er ekki alveg komið á hreint, en auðvitað væri það gaman.

Nú það styttist óðum í innflutningspartýið, 26. apríl, og þeim sem lesa þetta blogg og þekkja mig er að sjálfsögðu líka boðið, hef fengið kvartanir um að fólki, sem hvortsem er ætlar ekki að mæta hafi ekki verið boðið. En þarna verður góðra gesta vant eins og vanalega þegar við höldum léttar veislur/partý, m.a og mér til mikillar gleði ætlar David Jones að mæta, Janet mætir að sjálfsögðu ásamt sínum manni, og svo Íslendingarnir sem ég þekki hérna, Hilmar, Einar, Davíð, Gunnar og Dísa. Patricia Wiszniewski, sem hjálpaði okkur mikið þegar við vorum nýkomin, mun einnig mæta. Þessa dagana er maður að hugsa um hvernig við ætlum að framkvæma þetta, og erum komin með góðar hugmyndir sem vonandi komast í framkvæmd. Það versta er að ég held að ekki sé hægt að fá rúllutertubrauð hérna.........kemur mér svosem ekki mikið á óvart. En eins og einn góður segir: "If life gives you lemons, make lemonade", maður gerir bara það besta úr því sem manni er gefið, og þá ætti þetta að ganga upp :)

Þangað til síðar........

Gristow, 9.maí kl.18

Fyrirsögnin uppfræðir fólk um fyrstu tónleika mína á erlendri grund. En búið er að staðfesta við okkur Hilmar, og núna hana Dísu sópranskvísu, að við erum ráðin til að halda tónleika í gamalli krikju í bænum Gristow, sem er rétt utan við bæinn Greifswald hérna í norður Þýskalandi, þetta er um 257 km ferðalag á bíl, sem er líklegt að við leigjum bara, þar sem það kostar svipað og að taka lestina. Þetta er, eins og áður sagði, hluti af listahátíðinni Nordischer Klang sem er gífurlega vinsæl norræn listahátið og hefur verið haldin reglulega allavega síðan 1999, þó hef ég heyrt raddir sem segja 17 ár, en ég veit ekki um það.

Þetta er allavega mjög virt hátíð, og hana sækja mjög margir. Ég er því stóránægður með þetta, vandinn sem snýr að okkur listafólkinu er að við erum í kirkju og þar er bara gamalt orgel, þannig að það er ekki hægt að fara alvega með hvað sem er, t.d eins og Hamraborgina og Sprett. En það er samt sem áður um auðugan garð að gresja. Við hittumst semsagt í dag, þrenningin, og æfðum saman nokkur lög, sem gekk bara stórvel, enda vant og prófessional fólk á ferðinni. Ég settist svo með Himma á kaffihús eftir á og við settum upp prógrammið undir einum kaffibolla (í mínu tilfelli "caramel macchiato")

Hér heldur veðrið áfram að leika við hvern sinn fingur í leiðindum, og lítið gaman að tala við hann Ásgeir Pál stórvin minn í Salzburg, sem segist vera með 20 stiga hita nánast allan sólarhringinn. En ég vona að þetta fari nú að skána hjá okku. Hún Dísa sem er með okkur á þessum tónleikum sagði mér áðan að fimmta hvert sumar er bara rigning og leiðindi hérna í Berlín, og það var í fyrra, þannig að þetta fer að batna.

Hérna fer svo að styttast í innflutningspartý sem verður haldið 26.apríl, og þá verður vonandi hægt að taka einhverjar myndir og henda inn á netið. Það hefur ekki verið mikið af myndatökum síðustu daga, og því ekki mikið að setja inn. Svo eru hugsanlegar aðrar stórfréttir af mér, en þær verða að bíða því forvitin skita fær ekki að vita. Maður má ekki eyða öllu púðrinu í einu bloggi, þá nennir engin að lesa næstu blogg :)

Núna í kvöld og um helgina er ég að fara henda saman og skanna inn allar nótur sem við þurfum að nota á tónleikunum þann 9.maí, ásamt því að byrja að æfa mig. Loksins fær maður eitthvað að gera. Það birtir aðeins yfir manni við það. Þó hefur geðið aðeins lést eftir að ég fór að hreyfa mig, en ég hef þó þyngst, þrátt fyrir að vera búinn að taka allt í gegn, en það þýðir ekki að ég hafi ekki grennst. Ég er nú bara búinn að vera að í 2 vikur......það er ekkert að marka, en vöðvamassinn hefur aukist, og það er fyrsta skrefið í góðri brennslu á fitu.....það og að borða endalaust. Þetta gengur allavega nokkuð vel, þó maður sé þjakaður af harðsperrum og vöðvatitringi eftir átökin. Jæja, það er nóg komið í dag, og ég punda hérna inn einhverju í næstu viku. Góða helgi.

Snargeðveikur Þjóðverji

Fannst réttast að henda þessu hérna inn. Þetta er í raun upprunalegi "numa numa" gaurinn. Stjörnugeðveikur Þjóðverji sem er í einhverju annarlegu ástandi. Kannski er hann bara Þrolli, og þá bið ég geðveika afsökunar.
Man eftir því þegar ég sá þetta í fyrsta skipti ætli það hafi verið 2004??

Næturfrost, og leiðindi

Þá er ekki komið sumar hjá okkur. Í morgun var nístandi frost, þegar ég fór í klassann, það er alls ekki skemmtilegt, maður er bara svo óþolinmóður að bíða eftir sumrinu, þar sem þetta verður vonandi í fyrsta skipti þar sem maður fær sumar yfir sumartímann :)

Ég fór á laugardaginn á tónleika með karlakór kjalnesinga sem voru staddir hér í helgarferð. Kórinn var bara nokkuð góður, þetta var skemmtileg tilbreyting á laugardegi. Ætlunin var svo að skella sér í bæinn að gera bara eitthvað, en það varð ekki raunin, í staðinn héngum við bara heima við og horfðum á videó, sem var nú bara alveg ágætt.

Tvívegis, síðan við komum hingað í okkar íbúð, höfum við fengið einhverja tilkynningu í pósti eða blaði sem límt var á gluggann um að einhver væri að koma til okkar og við þyrftum að vera heima annars þyrftum við að borga fyrir endurkomu. Þetta finnst mér alveg magnað, í eitt skiptið kom maður að lesa af einhverjum svona mælum sem eru hérna á öllum ofnum, og ég hef ekki hugmynd um hvað gera. Í annað skiptið kom svo maður hérna kl 7 um morgununn til að mæla kraftinn í viftunum á baðinu og í eldhúsinu....!!! Maður skilur bara ekki alvega í hvaða rugli maður er eiginlega, en svona er þetta nú bara.

Ég kláraði svo í gær tölvuleikinn "The Witcher", sem er bara einn af skemmtilegri tölvuleikjum sem ég hef spilað. Tók reyndar afskaplega langan tíma, en ég naut þess, nú get ég loksins farið að einbeita mér að náminu :)

Vegna óhagstæðs gengis, og ákvörðunar kennara míns að hækka gjaldskránna sína, er ég tilneyddur til að fækka söngtímum úr 2 í 1 á viku, sem er alveg ömurlegt! EN maður verður víst að sníða sér stakk eftir vexti og það geri ég með þessu, í staðinn ætla ég að reyna að komast að hjá píanóleikara á móti söngtímum, það er helmingi ódýrara fyrir mig. Á síðasta föstudag var ég í söngtíma og má segja að það hafi verið stærsti söngtími sem ég hef upplifað síðan ég kom hingað, þar sem ýmislegt magnað gerðist, og þar fattaði ég í fyrsta skipti hvernig hægt er að tengja lágan barka, opin háls og háan mjúkagóm með stuðningi. Þetta er nú bara ekki nógu auðvelt, en ætti að verða það þegar maður er búinn að fatta, nú er það bara spurning um að æfa sig.

Það má einnig segja að myndbandið hér að neðan, með meistara Pavarotti, hafi kennt mér ÓTRÚLEGA mikið, hann er hérna að sýna muninn á að syngja í því sem heitir "cover"/"deckung"/"protection".

Nýr dagur, nýtt ýmislegt

Ég vil hérna draga eilítið úr lofinu á ræktinni sem ég er í, þó hún sé bara mjög góð til síns brúks.

Ókostir:
- Ekki fær maður lítil æfingahandklæði
- Ekki er hægt að ná sér í kalt vatn í salnum
- Ekki má raka sig í sturtunum eða búningsklefunum!!!
- Ekki eru hitablöndunartæki á sturtum
- Ekki opnar fyrr en kl 9 tvo daga í viku.
Kostir:
- Ódýrt (29,90 EUR á mánuði)
- Flott útlítandi aðstaða
- Flott og nýleg tæki
- Engin bið eftir tækjum
- Videóleiga ókeypis fyrir meðlimi (takmarkað úrval)
- Vingjarnlegt og hjálplegt starfsfólk

Þannig að ég ætla ekki að kvarta, þetta er bara öðruvísi en maður er vanur.

Hér er veðrið leiðinlegt þessa dagana, í kringum 10°, og þéttskýjað eða rigning síðan á þriðjudag. Það er þó að hækka hitinn hægt og rólega og við verðum bara að vera róleg og bíða.

Töfaldur söngtími var í gær, þar sem mér gekk bara nokkuð vel, seinni tíminn var með píanóleikara, þar sem rent var í gegnum ný lög og gömul, með sæmilegum árangri. Framundan er svo að öllum líkindum léttir tónleikar með Hilmari Erni, þar sem búið er að biðja okkur að flyta músík á "Nordischer Klang" sem er mjög stór og merkileg tónlistarhátíð sem haldin er hérna í Þýskalandi. Ég vona að það gangi allt saman eftir, þarna verður meðal annarra Ragga Grönd, og einhverjir flreir pappírar úr íslensku listalífi. Þetta er þó ekki ákveðið, en gaman að vita af þessu. Við komum fram 8.maí að öllum líkindum.

Um helgina er stefnan tekin á að kíkja á íslenskan karlakór (Kjalnesingar) sem er hér í einhverri opinberri heimsókn, auk þess að kíkja aðeins í bæinn með Soffíu. Svo í kvöld er Íslendingafélagið eitthvað að fara hittast eins og venjulega einusinni mánuði að ég held, og ég er að hugsa hvort maður kíki á það.

Ekki var það fleira að sinni, verið þið sæl.

Þá er maður byrjaður í ræktinni....

....enn einusinni!!

Búinn að skrá sig í mjög flotta líkamsræktarstöð hérna nálægt, Fitness Company, þetta er víst eitthvað alþjóðlegt fyrirbæri, og maður hefur aðgang að öllum Fitness Company stöðvunum. Þetta er að vissu leiti flottara en WorldClass heima, en að öðru leiti ekki. Þarna eru t.d ekki æfingahandklæði, ekki blöndunartæki í sturtunum og ekki vatnsstandur. EN umhverfið er mjög flott, ný tæki og vel viðhaldið. Konurnar eru með sér gufu í klefanum sínum, en karlarnir eru með unisex gufu, og ólíkt íslandi þá er BANNAÐ að vera í sundfötum í gufunni, en mér er svosem sama um það, ég er engin tepra.

Maður fer af stað með offorsi, ég er nú samt að passa að ofgera mér ekki, og ég ákvað að nota aftur Body-for-Life, prógrammið sem hentaði mér mjög vel síðast þegar ég notaði það. Mjög einfallt og fljótlegt. Hættan er alltaf sú að gera of mikið, þá verður maður þreyttur á þessu og gefst upp fljótt, en þetta prógram er sett upp þannig að maður eiginlega getur það ekki.

Í fyrsta skipti síðan ég byrjaði að hreyfa mig eitthvað af viti, finn ég loksins þetta "high", sem fólk talar um, og ég held að það helgist af því að ég er búinn að vera frekar "low" í langan tíma. Þannig að núna er ekkert mál að breyta mataræði og ekkert mál sleppa áfengi og þannig rugli, það er bara mjög fínt. Nú er bara spurning um að stíga ölduna meðan hún er, og taka svo á æfingaleiðanum þegar hann kemur upp.

Í matarhorninu þetta skiptið er uppskrift að "Power-breakfast" sem ég henti saman í morgun, eiginlega stærsta próteinbomba sem ég hef búið til.

2 egg
1 skinkusneið (alvöru þykk þýsk skinka)
kotasæla
pizzakrydd jurtablanda

Steikja eggin báðumegin, henda skinkunni á sjóðheita pönnuna, láta hana rétt hitna og snúa svo við og setja kotasæluna og kryddið ofan á. Þegar kotasælan er byrjuð að bráðna tekur maður skinkuna af með kotasælunni og setur ofan á annað eggið á disk, og svo hitt eggið ofaná. Nóg salt er í skinkunni, þanngi að ekki er þörf á að salta þetta sérstaklega. En gaman er að nota pipar.