Heimsspekiblogg

Skrifað meðan em leikur Þjóðverja og Spánverja er i "fullum gangi".

Maður veltir því fyrir sér á þessum tímapunkti hversu virði allt er sem maður tekur sér fyrir hendur.....að fara til annars lands til að læra það sem virðist óendanlegt. Hvað þarf maður að gera þetta lengi til að fara líða eins og þetta sé eitthvað sem maður vill gera að eilífu. Reyndar langar mig að gera þetta að eilífu, en mig langar að gera það vel og þannig að sómi sé að hvar sem maður stingur niður fæti! Ekki það að maður sé ósáttur við það sem maður hefur gert hingaðtil, heldur, snýst þetta meira um tilgang manns í þessu lífi. Ég veit það að tilkoma lífs í mína umsjón mun breyta einhverju, en mun það hafa áhrif á tilgang lífsins? Það verður að koma í ljós, aðeins þeir sem hafa upplifað þetta geta vitað það. Ég tel að ég mundi róast á geðinu, og verða sáttari með það sem ég hef í dag, sem er í raun það sem ég þarf núna. En hvað það verður kemur í ljós. ´

Þessi einhver gerir mann íhugulli en áður, og því blogga ég þetta blogg til að hlæja að þegar ég verð fimmtugur :) Maður veit jú alltaf best þeim mun eldri sem maður verður, en maður veit að sjálfsögðu aðeins betur en maður sjálfur, ekki aðrir :) Held að það sé svolítið mikilvægur punktur. 70 mín núna liðar af leiknum, og ekkert að gerast. Það verður virkilega gaman að sjá hvað verður skv draumum mannsins........hingaðtil segja þeir að fyrsta barn verði strákur........skv síðustu draumum, feitur strákur með himinblá augu :) En, það sem mann dreymir um er oftast öfugt við það sem maður sér, því veit maður auðvitað ekki, en hvort sem það er er það alltaf velkomið í minn heim :)

Æfingar ganga eins og skíturinn, og breytingar eru nánast daglegt brauð, sem er mjög ömurlegt, en eins og áður sagðu, þá er ekki við það ráðið í þessum bransa. Nema maður sé frægari en djöfullinn sjálfur........sjáum hvað setur :)

Í gær var partý hjá þeim gömlu við hliðina á okkur, og þau fengu lánað hjá okkur borð og stóla. Ég fékk svo uppábank um átta leitið, þar sem þau færðu mér disk með ýmsu grilluðu góðgæti, sem var bara ótrúlega gott. Þetta er yndislegt fólk hérna við hliðina á okkur, það er ekki hægt að segja annað. Ég er búinn að vera euitthvað veikur síðustu daga og hef ekki getað sungið eins og fullkomið er, enda hef ég verið að hvíla mig. Nú er málið allt annað og ég farinn að sygja eins og ég á að mér.

Lífið er gott og við eigum að njóta þess.

Ég er sigurvegari, ég er bestur (afþví að ég vann í fótbolta)

Ég setti saman lítið myndband í tilefni gærdagsins, og þið sem þetta lesið geti notið þess hérna.

Þetta er aðallega gert fyrir þann næstelsta og Vater.

Stór dagur í dag

Stórleikur Þýskalands og Tyrklands í kvöld, og búist er við rúmlega 500.þús manns við Brandenborgarhliðið til að horfa á leikinn. Hvort ég verði þar á meðal er ekki ákveðið á þessari stundu, en ég get glatt hann karl föður minn að ég mun horfa á leikinn, en bara afvþví að ég er "í róm". Þetta verður vissulega spennandi ef tyrkirnir ná að redda sér fyrir horn eins og þeir hafa gert í síðust tveimur leikjum sem ég hef séð. Þeir spila leiðinlegasta fótbolta sem ég hef séð lengi.

Ég er allavega með rissjónvarpið mitt hérna og er búinn að bjóða íslendingunum að kíkja hingað að horfa ef þeir vilja. Eigum þó eftir að heyrast frekar í dag og ræða þessi mál. Held að það verði gaman að kíkja í bæinn, en spurning hvort maður eigi eftir að sjá eitthvað eða njóta þess......ég meina það verður umtalsvert meira af fólki þar en er á öllu íslandi :) Jæja sjáum hvað setur.

Æfingar fyrir "Die Fledermaus" ganga bara sæmilega, þó finnst mér soldið skipulagsleysi einkenna æfingaferlið hjá þessu fólki. Það var t.d sent út æfingaplan fyrir rúmum mánuði, sem ég prentaði út og hengdi upp hjá mér til að muna þetta allt saman og til að skipuleggja tímann minn þannig að ég verði ekki mikið fjarverandi frá vinnu. Það gekk allt vel, þangað til þau sendu annað plan, og annað og annað, sem við erum að vinna eftir í dag. Þetta er orðið allt of ruglingslegt, og varð til þess að ég gleymdi æfingu sem ég átti að vera á í gær! Það er eflaust erfitt að setja svona saman svo öllum líki, en svona er það bara. Svo er ein leikstýran þarna sífellt blaðrandi að útskýra sína sýn á málið og hvernig hún sér atriðin og það fer stundum bara fullt af mikilvægum tíma í blaður og vitleysu. En þau eru svosem ekki ein um það, svona virðist þetta bara vera allsstaðar sem ég hef komið. Þetta er bara framtíðin í þessu, ef maður kemst inn í þennan bransa.

Jæja þarf að fara dusta rykið af þýsku fótboltasöngvunum svo maður sé liðtækur í kvöld:

Zieht den Bayern die Lederhosen aus,
Lederhosen aus, Lederhosen aus
Zieht den Bayern die Lederhosen aus,
Lederhosen aus, Lederhosen aus
(við lagið Yellow Submarine)

---------------------------------

Freude schöner Fußballzauber,
das ist unser Sankt Pauli,
Zuckerpässe, Zaubertore, Fußballgötter allesamt,
Kurzpassspiel und Übersteiger, so kriegt das nur einer hin,
Freudeschöner Fußballzauber,
das ist unser Sankt Pauli,
La, La, La, La, La, La, La, La, La, La
--------------------------------

Steht auf, wenn ihr deutsche seid.
Steht auf, wenn ihr deutsche seid.....

-----------------------------
Auf geht's Deutschland–schiesst ein tor'

Blogg til að blogga

Helgin flaut ljúflega hjá, og ég leyfði mér ýmsan ólifnað, þar sem ég er svo óvanur að vera einn heima :) Sökum anna síðustu daga hef ég ekki verið að sinna líkamsræktinni eins og vera ber, en hef nú aftur tekið upp þráðinn. Því var kærkomið að klára þann litla bjór sem þó var eftir í ísskápnum.....og jafnvel kaupa aðeins meira því það var svo lítið til. Nú en Gunnar kíkti hérna við á föstudaginn, og við skelltum okkur á "gula staðinn" svokallaða þar sem við snæddum dýrindis steikur, og drukkum dýrindis bjóra með, auk þess að fá okkur góðan eftirrétt. Á staðnum var sjónvarp, og við, sem erum litlir fótboltaáhugamenn festumst yfir leik Króata og Tyrkja, þar sem við búum nú nánast í Tyrklandi hérna. Ég reyndar hélt með Króonum allan tímann, því mér fannst bara Tyrkir spila leiðinlegan bolta. Við fórum svo heim á leið í byrjun seinni hálfleiks, og keyptum okkur öl á leiðinni. Svo horfum við á seinnihlutann hérna heima á Kurfürsten, voða gaman, en svekkjandi. Svo kíktum við á nokkur óperubrot áður en hann hélt heim á leið.

Laugardagur og sunnudagur fór svo bara í að læra eins og góðum námsmanni sæmir. Hitastigið á Sunnudeginum var svo bara alveg fáránlegt, þá var það nú aðallega rakinn sem náði til manns. Þetta endaði svo allt með heljarinnar þrumuveðri um kvöldið, sem var nú gaman að upplifa, þó maður nú nokkrum sinnum gert það áður. Ég tók einhverjar myndir af því, og mun henda þeim hérna inn við tækifæri, ásamt fótboltaólátamyndum, lúðrasveitar vakningu og rigningamyndum.

Æfing í kvöld, og ég tilbúinn eftir helgina, að takast á við það sem súrkálið hendir að mér :)

Helgin að koma með bros á vör

Jú viti menn hér er hún komin eina ferðina enn, blessuð helgin.

Í gærkvöldi ólgaði hér allt af ólátum og vitleysu vegna þess að Þjóðverjar voru víst að vinna einhvern fótboltaleik. Þetta var þó allt í góðu, og menn skutu upp flugeldum hérna af svölunum, og fólk var öskrandi á gatnamótunum hérna fyrir utan hjá okkur, en þar er einmitt líka lítill pöbb, þar sem svona leikir eru alltaf sýndir. Ég vissi ekki að þessi leikur var í gangi, og brá ekkert smá þegar þetta kláraðist, því þvílík voru öskrin hérna útúm allt. Menn keyrðu hér um flautandi á bílunum sínum, og þegar var flautað á gatnamótunum hér fyrir utan, þá öskraði fólkið, en ef það var ekki flautað, þá var bara púað og hið sívinsæla fokkmerki sett á loft. Ég hentist út í glugga, og tók eitthvað videó af þessu, ef ég nenni að fara klippa þetta eitthvað til, þá kannski hendi ég þessu inn á myndasvæðið mitt um helgina, eða bara einhverntíma.

Í dag fór ég svo í tíma hjá Reiner Goldberg nokkrum, sem hefur gert það gott um allan heim í flest öllum stóru húsunum. Hann er tenór, um sjötugt held ég, og getur enn pumpað útúr sér gullfallegum tónum, m.v hvað hann er gamall. Þetta er einn af þessum mönnum sem hefur greinilega ekki þurft að hafa allt of mikið fyrir tækninni, því hann í raun bara sýnir og svo á maður að herma :) En það er að vissuleiti gott að læra þannig líka þegar maður er búinn að vera svo tæknilega þenkjandi lengi. Þetta er fínn kall, og tekur alls ekki mikið fyrir tímann, sem er mjög gott.

Nú svo á eftir er ég að hendast út að borða á hinum svokallaða "gula stað", sem dregur nafn sitt ekki af þeim sem vinna þar, heldur útliti hússins, þetta er svakalega góður grillstaður, og hrikalega ódýr. Þangað höfum við eiginkonan, farið með alla okkar gesti, að undanskildum þeim frá Holtinu, þar sem við vorum eiginlega ekki búin að uppgötva staðinn þá. En ég hlakka mikið til að borga lítið sem ekkert fyrir mikið sem allt.

BESTU ÞAKKIR fá allir þeir sem lögðu leið sína í kommentakerfið hjá mér. Ég kann virkilega að meta þann hlýhug sem okkur er sýndur. Gaman líka að sjá hverjir það eru sem lesa.

Viel Spass.

17.júni 2008

Þetta hátíðarblogg mitt er nú ekki langt. En ég er kominn aftur til Berlínar og eiginkonan varð eftir á landi ísa. Já kallinn er bara búinn að gifta sig öllum að óvörum......en það var auðvitað meiri nauðsyn en eitthvað sem átti að gerast strax, því verður svona "alvöru" síðar, þar sem við vonandi getum boðið einhverjum :)

Nú athöfnin tók litlar 5 mín hjá Sýslumanni á Selfossi í stórgóðu veðri. Begga frænka og sá gamli voru vottar. Systkyni mín sem ennþá eru heima, voru viðstödd ásamt þeirri gömlu. Þetta var mjög ánægjuleg stund, og það sem átti upphaflega að vera bara gallbuxur og eitthvað létt, varð aðeins formlegra en maður hafði planað. Að lokinni athöfn var skálað í freyðivíni niðri við á, og svo haldið á Rauða húsið á Eyrarbakka, þar sem hópurinn fékk sér að borða brúðkaupsmat. Alltsaman var þetta nú búið kl 16:00. Ekki flókið það...... hjónakornin héldu svo í Fléttarann, þar sem við steinsofnuðum. Þegar við rifum okkur svo upp, þá var pöntuð pizza og gott fólk kom í heimsókn og gladdist með okkur. Ég flaug svo aftur hingað til Berlínar í dag, og gat því ekki notið 17.júní, eins og hefði verið gaman. Fékk einnig póst frá sendiráðinu íslenska, og þau voru með eitthvað boð í dag hérna í Berlín, sem ég missti þvímiður líka af. Hefði gjarnan viljað mæta og sjá aðra hérna, maður gerur allt of lítið af því.

Jæja, daglegt streð hefst á morgun, þar sem ég fer á sérstaka framburðaræfingu vegna Leðurblökunnar sem verður sýnd þann 13 Júlí nk.

Ekki var það meira að sinni, en hér er rakt og fínt, eins og vanalega og ég lýkþeim 17. með köldum bjór og Battlestar Galactica.

JUST MARRIED :)

Á Íslandi

Þar lenti ég seint seint á fimmtudaginn síðasta. Tókst að ná mér í heiftarlegt ofnæmi eftir að hafa borðar fræmengað salat. Ég vissi að kannski fengi ég einhver viðbrögð, en þar sem þau hafa oft á tíðum verið væg, þá lét ég til leiðast, með þeim afleiðingum að ég bólgnaði allur upp og, gat ekki talað sökum bólgu í mjúkagómnum. Alveg hrikaleg lífsreynsla, en var þó ekki stórhættu, þar sem öndunarvegurinn hélst þó opinn. Einnig missti ég heyrnina á báðum eyrum tímabundið, þar sem eyrun gátu ekki þrýstijafnað sig í aðflugi vegna bólgu. Mæli ekki með þessu :)

Nú veðrið hérna er búið að vera með allrabesta móti dagana sem við höfum verið hér. Skruppum á Selfoss með pappíra til sýslumanns, og fengum okkur svo ís. Þá rákumst við á þann gamla úr Hveratúni, en hann hafði lagt súbarú sínum yfir tvö bílasstæði fyrir utan apótekið og var að leita að VÍS. Það var auðvitað gaman að hitta þann gamla þar sem hann var eldhress að vanda.

Nú gær var svo útskrift líffræðingsins í fjölskyldunni. Við Soffía og Binni, vorum heima á meðan útskrifitin fór fram til að undirbúa komu þeirra fjölmörgu gesta sem von var á. Veislan var bara hin allra besta í litlu húsnæði og litlu eldhúsi. Gaman var að hitta alla ættingjana, að vanda. Guðný var, að mér skilst stóránægð með þetta alltsaman, og þannig á það að vera. Tekin voru ógrynni af myndum, og eflaust dettur eitthvað af þeim inn á þetta eða annað bloggið í fjölskyldunni :)

Stefnan er svo tekin austur í dag, þar sem á að reyna að koma "gömlu" búslóðinni betur fyrir í Holtinu, þar sem mér skilst að allt sé útúm allt þar á bæ. Maður er því að fara í svona sektarkenndarferð :)

Varðandi komment við síðasta bloggi, þá er það nú þannig að trúin tilheyrir hverjum og einum og er innra mál hvers og eins. Þó þarna séu nokkur rotin epli þá skemma þau alltaf útfrá sér, og stofnun sem slík styður það. Það er því stofnunin sem slík sem ég er að mótmæla, og sú staðreynd að skipulögð trúarbrögð eru aldrei af hinu góða, og hafa aldrei verið. Þetta var bara síðasta kornið. Og varðandi kirkjuna hans Bjössa, mér þykir það góð hugmynd, en þá þarf líklegast að stofna sérstakt trúfélag í kringum það ekki satt? Jæja nóg af bulli í þetta skiptið, ég sé ykkur svo aftur hér í tölvulandi þann 17 júní, þar sem ég blogga sértakt hátíðarblogg :)

Brrrrrr

Það er frekar kalt í höfuðborg þýskalands þessa dagana, rétt um 18-20°C og skýjað, gott ef það gæti bara ekki ringt hérna á næsta sólarhring.

Nú er ég einn í höllinni, og dagurinn skiptist á milli þess að fara á söngæfingar og vinna, það hefur ekkert breyst frá því ég var heima :) Nú jæja en hvað með það, ég er svo á leið til Íslands á morgun, og þar verður meðal annars farið í útskriftarveislu hjá duglegu systur minni sem hafði það af önnur af systkinunum að þræla sér í gegnum Háskóla, og því ber að sjálfsögðu að fagna. Það er að sjálfsögðu tilhlökkun í manni að koma aðeins heim, en það er nú bara aðallega til að hitta soninn, og fjölskylduna. Annað á dagskrá verður upplýst síðar.

Ég er mikið búinn að vera vellta fyrir mér þjóðverjum, og það er ýmislegt skrítið sem ég hef rekist á, hér kemur örstutt upptalning:

-Þeir eru ekki stundvísir, eins og margir Íslendingar virðast halda (lestarkerfið er hugsanlega eina undantekningin, en það er bara afþví að klukkan breytist í samræmi við það hvar lestarnar eru hverju sinni :))
-Þeir eru ekki þolinmóðir
-Þeir eru ekki skilningsríkir
-Stór hluti karlmann er með hring í eyrum (öðru eða báðum)
-Um 10-15% kvenna eru með hár sem er litað eins og rauðrófa eða aflitað með svarta rót.
-Bjórinn er frekar ódýr
-Matur er frekar ódýr
-Kvikmyndahús er frekar dýrt(þ.e eina húsið sem sýnir myndir á upprunalegu tungumáli)
-Þeir þjóðverjar sem ég þekki skammast sín fyrir skrifræðið og stífnina hérna.
-Rúllustigar á lestarstöðvum fara sjálfkrafa í gang ef einhver þarf að nota þá.
-Ef barn fæðist í þýskalandi og foreldrar eru ekki giftir er barinu úthlutað lögfræðingi.
-Það verður að vera búið að ákveða nafn á barn innan 6 vikna.
-Í mat er til eitthvað sem heitir "sterkt", en það er ekki sterkt.
-Í bakaríum er aðallega hægt að fá svampbotnakökur og jóla og sandkökur.
-Þeir elska Ísland og Íslendinga, einhverrahlutavegna.
-Ef maður notar ekki "vöru aðskiljara" á kassa í verslunum verður starfsfólk pirrað
-Hér má ekki grilla utandyra í fjölbýlishúsum (í mörgum hverfum)
-ALLT sjónvarpsefni er á þýsku
-Ef það er ekki búið að skrifa það niður í dagbókina þá er það ekki til.
-Ekkert til hérna sem heitir að vera spontant.
-Þýskir túristar hirða allt lauslegt.
-Þýskir túristar fara ekki út að borða ef matur er innifalinn í hóteli.
-Þýskir túristar frátaka sólbekki án þess að nota þá.

Þrátt fyrir allt þetta, þekki ég nú nokkra þjóðverja sem eru auðvitað fínasta fólk, og maður á auðvitað ekki að vera alhæfa svona, en svona lítur þetta bara út fyrir einföldum Íslendingi.

Í kjölfar þess að Hilmar hefur sagt upp störfum í Skálholti, hef ég ákveðið að segja mig úr íslensku þjóðkirkjunni,, og hef skrifað langt bréf sem ég mun einnig senda á biskupsstofu um málið........ekki það að það verði lesið þar, en það er bara svona prinsip mál.

Sunnudagur til sólar

Enn einn sunnudagurinn hér í Berlín og veðrið bara frábært......ég hugsa nú samt að bloggum um veður sé lokið í bili þangað til eittvað breytist, maður er bara svo viðbúinn því að allt snúist allt í einu og maður sé staddur í íslensku sumarveðri :)

Ég er bara á fullu að læra hlutverkið mitt í Leðurblökunni, og við erum með gesti. Soffía er búin að sjá um að fara "rúntinn", og ég er búinn að vera heima að læra. Í gær var svo músíkæfing, sem bara ég mætti á.....!! Alveg magnað! Maður hélt að hér tæki fólk söngnum alvarlega. Jæja en æfingin gekk allavega vel, ég held ég eigi eftir að geta skilað þessu svo sómi sé af fyrir mig.

Nú getur maður bloggað um það sem er að gerast í "barnamálum", við Soffía fórum á kynningarkvöld fyrir FERA, sem er svona félagsskapur ljósmæðra hérna í Berlín, þau eru til húsa ekki langt frá okkur, og því var tilvalið að fara þangað, þau eru með 3 kvensjúkdóma og fæðingalækna, og einn þeirra, sem er lækninrinn "okkar", er stofnandi þessa félagsskapar. Hann er alveg ótrúleg frábær og talar mjög góða ensku, hann er búinn að ráðleggja okkur hjálpa nákvæmlega eins og maður var að vona. Hann tildæmis sagði okkur endilega að fara í þessi hefðbundnu litningagalla skönn, og sagði okkur allt um það. Efir að við fórum í þetta eru nú um 1:60000 að eitthvað sé að, og það eru 90% líkur á að það sé rétt. En þetta eru auðvitað bara þrennt sem er skannað fyrir, þannig að ekkert öruggt í þessum heimi, maður vonar þá auðvitða það besta. EN þetta er eitthvað sem kallast Geburtshaus, eða fæðingarheimili, og er því ekki spítali sem slíkur. Barnið fæðist og svo förum við bara heim 4-6 tímum seinna, það var pínusjokkerandi að heyra það, en þau hafa séð það að börnum og foreldrum gengur betur ef þau eru heima en 2-3 daga á spítala......ég verð að segja að þetta er það eina sem mér þykir svona "óöryggi" en auðvitað veit ég að það er ekki, þetta fólk ætti að vita hvað það er að tala um. Nú svo eru allskyns óöryggi í gangi, eins og t.d með tryggingar og annað slíkt, en mér skilst að evrópska skírteinið eigi að covera þetta alltsaman. Þó gæti verið að við þyrftum að borga einhvern 45.þús kall. En þá bara gerum við það...þýðir ekkert að vera væla. Nú svo tekur við ýmislegt sem fólk þarf almennt ekki að gera.....eins og að ver búinn að ákv nafnið á barninu fljótlega svo við getum fengið útgefið vegabréf handa því. Og ef við erum ekki gift, þá er allskyns fáránleg pappírsvinna sem við þurfum að ganga í gegnum....og barnið fær skipaðan þýskan lögfræðing sem á að gæta hagsmuna þess. Úff úff, maður nennir nú ekki að pæla í þessu.

Jæja meira síðar, erum að fara í pikknikk með tengdó og co :)

Eftir fréttir....

Byrja nú á þakklæti til allra sem sendu okkur hamingjuóskir í commenta kerfinu.

Ég birt hér létta frumorta vísu (afþví ég er orðin svo gamall), sem fékk margar ágiskanir. En svarið er að sjálfsögðu einfallt í kjölfar nýjustui frétta héðan frá Kurfürstenstrasse.

Hvað er ég?
Ekki er ég valin úr hópum kvinna,
tilheyri samt, án þess að vinna.
Lítið ég gef nema kærleik í hjarta
Tek mér það leyfi aðeins að kvarta
þegar ég þarf þess því þannig ég lifi.

Hræðslu ég vek þó sumum í huga
þó er ég saklaus en næ fólk að buga
gefðu mér ást þína, líf og hjarta
ég hef mér þá eitthvað í lífin'að skarta.
því að ég þarf þess og þannig ég lifi.
-------

Æfingar eru hafnar á fullu fyrir Leðurblökuna, og ekki hægt að segja annað en að það sé komin tilhlökkun í mann. Þetta er skemmtileg sýning, og mjög fyndin. En svo veit maður ekki hvað þessi leikstjórnarnemar ákveða að gera með þetta. Vonandi verður það bara nokkuð eðlilegt....sem er líklega fjarlægur draumur, þar sem óperu og leiksýningar hérna í Berlín eru að verða þekktar fyrir allskyns rugl eins og fólk hlaupandi um nakið á sviði, rotnandi kanínuhræ á videóskjá, osfrv rugl. Það er í raun magnað hvað "listin" er í huga sumra ljótt hugtak. Á lít á sjálfan mig sem frekar umburðarlindan, en þegar kemur að algjörri afbökun á söguþræði og birtingu atriða sem bara hafa ákkúrat ekkert með söguna að gera, þá verður maður soldið skúffaður. EN þetta er auðvitað mín skoðun, það eru misjafnar skoðanir á þessu eins og svo mörgu öðru. En ég er búinn að mæta á 2 æfingar, þar sem mikið er talað á þýsku, og ég skil nánast ekki helminginn af því sem er sagt, en ég skil oftast nóg til að ná útgangspunktinum. Þetta tekur allt tíma, en ég hef með mér í þessu eina norska mótleikkonu, sem talar góða þýsku, og útskýrir fyrir mér ef ég alveg úti á þekju! Þetta er semsagt bara fínasta fínt!

Nú af veðrinu er það að frétta að hér er bara gjörsamlega búið að vera steikarveður í rúma viku, og virðist ekkert lát vera á. Það er ekki laust við að maður biðji um rigningu eða kulda í einn dag! En ekki mikið meira en það, því þá er maður að svíkja grundavallar prinispp, að allt er betra en veðrið á Íslandi :) Eða svo til maður saknar þess þó af og til í mestu hitnum.

Jæja, ekki hef ég meira að segja að sinni.

Stóru fréttirnar.....

........sem ég var búinn að lofa eru ss þær að von er á nýjum leigjanda hérna hjá okkur á Kurfürstenstr.75. Vandamálið er það að viðkomandi mun ekki borga neina leigu í 18 ár, sem er ókostur :) En það er samtsem áður talsverð tilhlökkun hér á bæ, og spennandi tímar framundan. Líklegast vita flestir af þessu núna, og því kannski ekki um neinar stórfréttir að ræða, en fínt að gera þetta bara svo á official hátt. Von er á þessum háæruverðuga gesti um 20.nóvember, sem er bara fínasta fínt. En maður fer þá ekki mikið heim um jólin held ég......þetta verður bara lítið ævintýr í staðin. Litla fjölskyldan á Kurfürstenstrasse........kannski ekki alveg nafn á barnabók, en verður að duga :) Þá er þetta loksins komið útúr skápnum og maður getur farið að missa útúr sér ýmislegt hérna á blogginu, sem maður er hingaðtil búinn að vera passa sig á :)

Í öðrum fréttum er það helst að ég er að fara syngja Alfred í "Die Fledermaus" hérna í Berlín þann 13 Júlí nk. Þetta er spennandi verkefni, og frekar erfitt hlutverk fyrir mig, en hvenær er svona lagað ekki erfitt, það þarf bara að vera skemmtilegt líka og þá gengur þetta allt upp!

Nú svo er bara steikjandi hiti hérna og búið að vera síðustu daga, alveg ótrúlega magnað, sama hitastig og á Rhodos!! Sem er alveg spaklega skemmtilegt. Það er bara spáð áframhaldandi hita hérna og steikjandi sól.........svona er lífið maður!!

Jæja, nóg í bili....gömlu spili....úti á þili.