Evran dottin í 107 og ég veit ekki hvað.....!!!

Hér hefur verið leiðindaveður undanfarna daga og lítið að gerast annað en vinna á fullu. Ég er þó búinn að vera reyna að skipuleggja mig og vinna eftir einhverjum áætlunum sem ég set mér fyrir, en það er bara ekki alveg að ganga. Við að breyta mataræðinu líkt og ég hef gert, fylgja alveg svakaleg fráhvörf, það er eiginlega með ólíkindum að manni líði svona, það læðast inn hugsanir eins og "hversvegna er ég að þessu?", sama hvað maður borðar maður er alltaf einhvernvegin svangur og það skapar bara ákveðin pirring í manni, sem er ekki gaman. Kannski/vonandi er þetta bara tímabundið. Ég er því búinn að taka þá ákvörðun að vera ekki alveg svona grófur í þessu eins og ég ætlaði mér upphaflega. Núna ætla ég að borða bara góðan mat, en þó sleppa sykri og glúteini eins og ég framast get. Brauð og kornmeti eru þó mikilvæg uppistaða fyrir mig, og því mun ég líklegast ekki sleppa því svo glatt.

Ég er komin á það að fara hreifa mig aftur, eins og komið hefur fram á þessari síðu, það felst í því að að loknu páskafríi mun ég hefja daglegar ferðir í ræktina þar sem ég ætla að reyna að fylgja einhverju plani í þetta skiptið. Maður hálf öfundar þau gömlu að vera að komast í gott form, þegar maður sjálfur hefur alla burði til að halda sér flottum líkamlega, en gerir það ekki. Jæja, en maður er þó byrjaður að hugsa þetta, því allt hefst jú á einni hugsun.

Ég henti mér svo í dag og lét tryggja allt draslið mitt, auk þess að tryggja okkur Soffíu gegn öllum þeim skaða sem við gætum hugsanlega valdið öðrum. Við erum því tryggð núna í bak og fyrir, fyrir 14 þús á ári, eins og staða evrunar er í dag. Svolítið mikið finnst mér, og kannski er þetta bara vitleysa, en það er búið og gert.

"Tilraunaeldhús Egils - matur fyrir hugsandi fólk"
Austurlenskt stir-fry að hætti tenorsins

Gulrætur
Paprika
Laukur
Engifer
Hvítlaukur
Kjúklingabringur
Black bean sauce
Soja sósa
Baunaspírur
Núðlur (má nota hvað sem er)
Kjúklinga/nauta soð

Skera kjúklingabringur í teninga, steikja á pönnu ásamt hvítlauk og engiferi. Eftir 3-4 mín setja saman við gróft skornar gulrætur, papriku og lauk (og eitthvað annað það grænmeti sem á hugan sækir) og svo auðvitað Black Bean sauce, sem gerir bragðið. Þetta er steikt saman í nokkra stund og smakkað til með kjöt eða kjúklingakrafti.

Sjóða þarf núðlurnar þegar maturinn er að verða tilbúinn. Gott er að byrja á að sjóða upp kjötkraft, þannig er hægt að nota hann bæði til að smakka til matinn, sjóða núðlurnar upp úr og svo er hægt að henda smá bok choi og jafnvel gulrótum eða öðru grænmeti samanvið og nota sem súpu á undan matnum. Nú má svo sturta matnum af pönnunni í eitthvað ílát, setja smá olíu á pönnuna, hella vatni/soði af núðlum og steikja þær á pönnunni ásamt baunaspírunum og smá soja sósu til að fá bragð. Hollt gott, ódýrt og einfallt.